იაპონელი რიოსეი სუგინაკას ამბავი, რომელიც საქართველოში ქართული ენის შესასწავლად ჩამოვიდა

იაპონელი რიოსეი სუგინაკა საქართველოში ქართული ენის შესასწავლად ჩამოვიდა და უკვე სამი წელია, რაც ჩვენს ქვეყანაში ცხოვრობს. ქართული ენის შესწავლის შემდეგ, გადაწყვიტა, ახალგაზრდებისთვის იაპონური ენა ესწავლებინა. რიოსეი საკმაოდ აქტიურია სოციალურ ქსელში, განსაკუთრებით იუთუბსა და ტიკტოკზე, სადაც ათასობით გამომწერი ჰყავს. მის იუთუბ არხზე შეგიძლიათ, იაპონური ენის ვიდეოგაკვეთილები ნახოთ, ხოლო ტიკტოკზე მოისმინოთ, რამდენად კარგად საუბრობს რიოსეი ქართულად.

Venue.-სთან ინტერვიუში მან სამომავლო გეგმებზე, ქართულ ტრადიციულ სამზარეულოზე და თავის საყვარელ კერძებზე ისაუბრა. გარდა ამისა, გაგვიმხილა, რომ ძალიან მოსწონს თამადის ინსტიტუტი და გვითხრა, რომ ერთხელ თავადაც სცადა თამადობა.

რამდენი ხანია, რაც საქართველოში იმყოფებით და როგორ მიიღეთ ჩვენს ქვეყანაში ჩამოსვლის გადაწყვეტილება?

დაახლოებით სამი წელია, რაც საქართველოში ვარ. ჯერ ორი წელი (2017 წლის გაზაფხულიდან 2019 წლის გაზაფხულამდე) და შემდეგ ერთი წელი (2019 წლის შემოდგომიდან – დღემდე). საქართველოში ჩამოსვლა იმიტომ გადავწყვიტე, რომ მინდოდა, ქართული ენა მესწავლა. პარალელურად, ვიპოვე იაპონურის შესწავლის შანსი. მეგონა, მნიშვნელოვანი იქნებოდა, ჩემი მშობლიური ენის სხვებისთვის სწავლებაც.

რა დრო დაგჭირდათ ქართულის შესასწავლად და გაგიჭირდათ თუ არა?

მგონია, რომ დაახლოებით ექვსი თვე დამჭირდა, სანამ ქართულად დავიწყებდი საუბარს. ქართული ენის სწავლა, რა თქმა უნდა, გამიჭირდა (ახლაც მიჭირს) განსაკუთრებით ზმნების უღლების სირთულის გამო.

თქვენი აზრით, ყველაზე ლამაზი ქართული სიტყვა რომელია?

მასპინძლობა („შხამი” – ეს სიტყვაც მიყვარს. ისაააა, ლამაზად ჟღერს…)

რომელი ქართული სიტყვის სწავლა გაგიჭირდათ ყველაზე მეტად?

„ბაყაყი წყალში ყიყინებს”. მეთქი რამდენი ”ყ” არის… რა ღადაობაა.

ჩვენი გადმოსახედიდან, იაპონური ენა და დამწერლობა საკმაოდ რთული ჩანს, ქართველი სტუდენტები როგორ ითვისებენ იაპონურ ენას?

როგორ და… ანუ თუ მოსწონთ იაპონური ენის სწავლა, სულ მეცადინეობენ. შეიძლება, იაპონური დამწერლობა იყოს რთული (ჩვენ სამი დამწერლობა გვაქვს და სამივეს ვიყენებთ), მაგრამ თუ მოტივაცია/მონდომება/ინტერესი აქვთ, სირთულეს არ ექნება მნიშვნელობა.

ახლა გადავიდეთ ქართულ და იაპონურ სამზარეულოზე, საქართველოში ერთ-ერთი ყველაზე პოპულარული კერძი აზიური სამზარეულოდან არის სუში, თქვენ როგორც იაპონელი, როგორ ფიქრობთ, თბილისში ყველაზე კარგ სუშის სად ამზადებენ?

„აკასაკა”, ზაქარია ფალიაშვილის #33-ში. არაა მარტო სუში, არამედ რამენი (ლაფშა), ტემფურა და სხვადასხვა გემრიელი საჭმლის ჭამა შეგიძლიათ.

ქართული კერძებიდან რომელია თქვენი ფავორიტი და თავად თუ ისწავლეთ რომელიმეს მომზადება?

ხინკალი მიყვარს. უფრო სწორად რომ ვთქვა, ხინკლის ჭამა მიყვარს. 

ქართულ ტრადიციულ სუფრას რაც შეეხება, თამადის ინსტიტუტზე რას ფიქრობთ, შეძლებთ ქართული სუფრის თამადობას? :)))

რამდენიმე დღის წინ მეგობრებმა დამპატიჟეს და იქ პირველად ვცადე თამადობა. საქართველოსა და იაპონიის ურთიერთობაზე დავლიეთ და მიუხედავად იმისა, რომ თამადობა რთული იყო, მომეწონა ძალიან. ოღონდ უფრო მეტი გამოცდილება მჭირდება.

საქართველოს რომელმა რეგიონმა მოგხიბლათ ყველაზე მეტად?

სვანეთმა. საოცარი იყო. სვანური ენაც.

რამდენ ხანს აპირებთ საქართველოში დარჩენას და რას გეგმავთ სამომავლოდ?

ახლა ისეთი სიტუაციაა მსოფლიოში, ჯერ, ალბათ, დიდი ხნით დავრჩები. მომავალში რას გავაკეთებ, არ ვიცი, მაგრამ ენებზე აუცილებლად ვიმეცადინებ უფრო მეტად.