რედაქტორის ბლოგი: არ მოგატყუებთ, თქვენს ეკრანებზე შემოჭრას ვაპირებთ

​ამბავი მრავალი წლის წინ, თსუ-ში დაიწყო, როდესაც რამდენიმე ენთუზიასტმა სტუდენტური ჟურნალის დაარსება გადავწყვიტეთ. დავიწყეთ და შევასრულეთ, იდეიდან რამდენიმე თვეში Studinfo.ge დაიბადა. 

ეს იყო პირველი ნაბიჯი შეგვექმნა დამოუკიდებელი მედია, რომელიც მედიაბაზარზე განსხვავებულ ნიშას დაიკავებდა. ამ წინადადებაზე ახლა გულიანად მეღიმება, რადგან 18 წლის ასაკში ნაკლებად ვფიქრობდი, მედიაბაზრის გამოწვევებზე, თუმცა, ახლა ვითარება შეიცვალა. 

Studinfo მალევე Venue-მ და Edulab-მა ჩაანაცვლა. ისევ დავიწყეთ, გუნდი განახლდა, დარჩნენ ძველებიც და მოვიდნენ ახლებიც. მთავარი რესურსი ისევ ენთუზიაზმი იყო. არ მახსოვს, საიდან მოდიოდა ამხელა ენერგია და რატომ ამოვიჩემე მქონოდა საკუთარი მედია 18 წლის ასაკში. თუმცა, ზუსტად ვიცოდი, რომ ერთ დღეს ამას შევძლებდი. მაშინაც მჯეროდა, როდესაც ჯერ კიდევ 9 წლის, ხელით დამზადებულ გაზეთებს მეზობლების კართან ვტოვებდი. 

ალბათ, გეცნობათ ის გრძნობა, როდესაც ვითარდები, ქმნი საკუთარ კარიერას, მუშაობ ვიღაცისთვის, მაგრამ რაღაც არ გასვენებს. პატარა მოუსვენარი არსება შენს შიგნით საკუთარ თამაშს თამაშობს და გიბიძგებს, რომ რაიმე შექმნა, თუნდაც უმნიშვნელო, რომელიც შენს სახელთან, იდენტობასთან იქნება დაკავშირებული. 

მე მიყვარს ის პატარა არსება, რომელიც ჩემში თამაშს არ წყვეტს და მუდამ სიახლისკენ მიბიძგებს. მის გარეშე ბევრ რამეს ვერ შევქმნიდი. ამ არსებაზე მოგვიანებით მოგითხრობთ. ეს ხომ პირველი სტატიაა, რედაქტორის ამპლუაში Venue-ზე. რა კარგად ჟღერს არა?! – რედაქტორის ამპლუაში.

ეს არსება არ გაჩერებულა და აგერ Venue დღევანდელ დღემდე მოიყვანა; ეს კი ახალი გუნდის დამსახურებით მოხდა. 

​რეალურად, რომ არ მოგატყუოთ, მკითხველთან ერთად ვცდილობთ, შევქმნათ ისეთი მედია, რომელიც არ მოგატყუებთ, მოგიყვებათ იმ ამბებზე, რომელიც მართლა გაინტერესებთ. Venue. ხელახლა დაიბადა და ახლა საკუთარ ენას აყალიბებს, სწავლობს და ვითარდება, რათა იქცეს თანამედროვე მედიაპლატფორმად, რომლის სახელის გაგონებაზე – სანდოობა, კრეატივი, განვითარება და ინოვაცია ამოტივტივდება თქვენს გონებაში. 

ჯანსაღი ამბიცია კარგია და ჩვენც სწორედ ამ მოტივით ვხელმძღვანელობთ. თუ გვკითხავთ, ვინ არის Venue. პასუხის გაცემა არ გაგვიჭირდება – ის ახალგაზრდა, ინოვატორი და მიზანსწრაფული ტიპია, რომელიც ცდილობს იპოვოს გზა, მედიაში ახალ გამოწვევებს უპასუხოს და ახალი სტანდარტები დაამკვიდროს. ხო, ვიცი, ზოგადი აღწერაა ეს, გვჭირდება უფრო მეტი კონკრეტიკა, თუმცა როგორც უკვე გითხარით, ჩვენ ის ტიპები ვართ, ვინც სულ ვსწავლობთ და არ ვჩერდებით ერთ ადგილზე. 

​ასე რომ, მე მაქვს თქვენთან კითხვა: იცით, როგორი უნდა იყოს თქვენი საყვარელი მედია?! – რა კრიტერიუმებს უნდა აკმაყოფილებდეს, რომ მან ღირსეული ადგილი დაიკავოს თქვენს ეკრანებზე? 

​არ მოგატყუებთ და გეტყვით, რომ ჩვენი მიზანი თქვენს ეკრანებზე შემოჭრაა. ახლა ზუსტ გზას ვეძებთ, რომ ეს მიზანი განვახორციელოთ. არ მოგატყუებთ და გეტყვით, რომ ალბათ, ბევრ შეცდომასაც დავუშვებთ, მაგრამ გპირდებით: რომ ასეთ დროს თავს დავხრით და ვიმუშავებთ მათ გამოსწორებაზე. 

დღევანდელი რეალობა განსხვავებულია. იყო უბრალოდ ონლაინ გამოცემა, აღარაა საინტერესო. მედიას ახალი ძალა სჭირდება. კრეატივია საჭირო. თხრობის განსხვავებული მანერაა საპოვნელი. მეტი ინდივიდუალიზმის დროა. შეიძლება, მინი-რევოლუციის დროა. 

​და მაინც, როგორი წარმოგიდგენია შენი საყვარელი მედია? 


გიორგი ურუშაძე