კრიორობოტები – ახალი ტექნოლოგია ინვიტრო განაყოფიერებაში

ინვიტრო განაყოფიერება მრავალი წელია, ადამიანებს ნანატრი შვილის ყოლაში ეხმარება. თუმცა გაყინული კვერცხუჯრედისა და ემბრიონების შენახვა კლინიკის სპეციალურ მაცივრებში ხშირად პრობლემებს ქმნის.

მაგალითად, 2018 წელს 4 000 კვერცხუჯრედი დაიკარგა, როცა მაცივარი მწყობრიდან გამოვიდა. გარდა ამისა, იყო შემთხვევები, როცა ემბრიონები დედის საშვილოსნოში მოთავსების შემდეგ, არ განაყოფიერდა.

მსგავსი შემთხვევები ხშირად არ ხდება, თუმცა როცა მსგავსი ფაქტები ფიქსირდება, ცხადია, ამით ბევრ ოჯახს ექმნება პრობლემა და რჩება იმედგაცრუებული.

ნიუ-იორკში დაფუძნებულმა სტარტაპმა, TMRW-მ, შექმნა ტექნოლოგია, რომელიც საშუალებას იძლევა, თავიდან ავიცილოთ მსგავსი ტრაგედიები, როგორებიცაა ემბრიონებისა და კვერცხუჯრედების განადგურება. ამის შესახებ CNN წერს.

როგორც სტარტაპის თანადამფუძნებელი ჯოშუა აბრამი აცხადებს, რომ კომპანიის მისიაა, მოახდინოს კვერცხუჯრედების შემნახველი მაცივრების ავტომატიზაცია, რათა კვერცხუჯრედები აბსოლუტურად დაცულ გარემოში ინახებოდეს და გადარჩეს სიცოცხლის თითოეული უჯრედი.

როგორ ინახება ემბრიონების და კვერცხუჯრედები

ბოლო დეკადის განმავლობაში, ხელოვნური განაყოფიერებისთვის განკუთვნილი ემბრიონები და კვერცხუჯრედები -196 გრადუს ცელსიუსზე ინახება.

აბრამის თქმით, მისი კომპანიის მეთოდი არის რევოლუციური, რაც ქალებს საშუალებას მისცემს, უფრო კარგად გააკონტროლონ მათთვის განკუთვნილი ბიოლოგიური მასალა. გარდა ამისა, სტარტაპის დამფუძნებელი ამბობს, რომ წლების განმავლობაში არ განვითარებულა კვერცხუჯრედების შენახვის ტექნოლოგია, რადგან ის დღემდე ადამიანის ხელით კეთდება და შეიძლება ითქვას, უსაფრთხოება სათანადოდ არ არის დაცული.

სტარტაპი თებერვალში დაფუძნდა და 60 მილიონი დოლარის ინვესტიცია ჩადო აღნიშნულ საქმეში. TMRW-ს ტექნოლოგია გულისხმობს რადიოსიხშირული იდენტიფიკაციის ჩიპების განთავსებას სპეციალურ ფლაკონებში, რომლებიც კვერცხუჯრედებისა და ემბრიონების შესანახად გამოიყენება.  აბრამის თქმით, ეს საშუალებას იძლევა, სრული სიზუსტით მოხდეს ნიმუშების იდენტიფიცირება და თვალყურის დევნება.

ფლაკონები ინახება თხევად აზოტში, „კრიო-რობოტის” ავზში, რომელიც აღჭურვილია სენსორებით. სწორედ ეს სენსორები აფიქსირებენ მცირე ცვლილებასაც კი, როგორიცაა მაგალითად, ტემპერატურის ცვლილებები, რამაც შეიძლება გამოიწვიოს პრობლემა.

პოტენციური უბედურებების დადგენა ხდება მანამდე, სანამ გაყინული ქსოვილები განიცდიან ცვლილებებს.  როგორც კომპანიაში ამბობენ, პაციენტის პირადი ინფორმაცია დაცულია სამხედრო დონის მონაცემების დაშიფვრის მეთოდის გამოყენებით.

დოქტორი უილიამ სკულკრაფტი, განაყოფიერებისა და ინვიტრო კომპანიის, CCRM-ის დამფუძნებელი, რომელსაც აშშ-ში 25 კლინიკა აქვს, TMRW-ის ტექნოლოგიაზე ცდას ატარებდა შემოწირული ნიმუშების გამოყენებით.

Schoolcraft ამბობს, რომ CCRM-ის უსაფრთხოების მიმდინარე ზომები გულისხმობს საცავების ვიზუალურ შემოწმებას თხევადი აზოტის გაჟონვის ინდიკატორების მოსაძიებლად, როგორიცაა კონდენსაცია და ყინვის დაგროვება. გარდა ამისა, თუ ავზის ტემპერატურა მნიშვნელოვნად მოიმატებს, რაც საფრთხეს უქმნის შენახულ ქსოვილებს, კლინიკის პერსონალის სხვადასხვა წევრთან ავტომატური ზარი ხორციელდება, ვიდრე ვინმე არ მოახდენს რეაგირებას.

TMRW სისტემა კი იმით გამოირჩევა, რომ გთავაზობთ მუდმივ, ავტომატიზებულ მონიტორინგს, ავზის პოტენციური ავარიების აღმოსაჩენად, ვიდრე ამას ადამიანი აღმოაჩენს. გარდა ამისა, TMRW-ის ტექნოლოგია უზრუნველყოფს უსაფრთხოების დამატებით დონეს, როცა საქმე ეხება ქსოვილების იდენტიფიკაციასა და თვალთვალს, – ამბობს Schoolcraft.

CCRM გეგმავს, ახალი ტექნოლოგია წლის ბოლომდე თავის ყველა კლინიკაში დანერგოს.