20 თებერვლიდან საქართველოს პირველ არხზე „ვოისი“ იწყება

საერთაშორისო მუსიკალური პროექტი „ვოისი“ საქართველოს პირველი არხის ეთერში 20 თებერვალს იწყება.

უკვე ჩაიწერა „ვოისის“ ბრმა არჩევანის პირველი გადაცემა და მონაწილეების პირველი ნაწილი მწვრთნელების წინაშე წარდგა. ჩაწერას დისტანციურად ესწრებოდა 100 უნიკალური ადგილის მქონე მაყურებელი, რომლებიც ფეისბუქ ჯგუფიდან შემოგვიერთდნენ.

შეგახსენებთ, „ვოისი“ მაყურებელს უნიკალურ შესაძლებლობას სთავაზობს – მსურველებს შეუძლიათ, პროექტის ჩაწერის პროცესს დისტანციურად დაესწრონ და მოიპოვონ საკუთარი ადგილი ეკრანზე.

მაყურებლის ჩართვა ხდება პროგრამა „ზუმის“ მეშვეობით. მაყურებელი დაინახავს სტუდიას, ხოლო სტუდიაში მყოფი ხალხი დაინახავს დიდ ეკრანებზე გამოტანილ მაყურებლის გამოსახულებას.

ონლაინჩაწერაზე დასასწრებად, აუცილებელია ოფიციალურ ფეისბუქ ჯგუფში (The Voice • საქართველოს მაყურებელი) გაწევრიანება, სადაც ყოველი გადაცემის ჩაწერის წინ ​გაზიარდება ბმული.

დამსწრეთა რაოდენობა შეზღუდულია, რადგან მხოლოდ 100 უნიკალური ადგილია. ვინც პირველი გადავა ბმულზე, ის მოიპოვებს ადგილს, ხოლო დანარჩენებს შეუძლიათ, „ზუმის“ პლატფორმიდან რომელიმე მაყურებლის გასვლის შემდეგ მოიპოვონ ადგილი.

უკვე ცნობილია ოთხივე მწვრთნელის ვინაობა, ესენი არიან: სტეფანე მღებრიშვილი, ნიკოლოზ რაჭველი, ნიაზ დიასამიძე და სალომე კორკოტაშვილი.