მენეჯერის მისია ყოველთვის წყნარ ზღვაში ცურვას არ ჰგავს. მაშინ, როცა კარიერის დასაწყისში მხოლოდ შენი თავი გაბარია, რთულ ეტაპებზე გადასვლისას, მთელი გუნდის მუშაობის პასუხისმგებლობა საკუთარ თავზე უნდა აიღო – შენი მოვალეობაა შთააგონო, წინ გაუძღვე, მოტივაცია მისცე და საბოლოოდ ორგანიზაციის მიზნები სრულყოფილად აღასრულო.
სათქმელად მარტივია და მოდით საქმეზე გადავიდეთ:
სამუშაო პროცესი ყველასთან ერთნაირი და მარტივი არ არის, რაც ხშირად ერთ-ერთ მთავარ გამოწვევას წარმოადგენს მენეჯერებისათვის.
როგორ შეიძლება გავხდეთ კარგი მენეჯერები, ისე რომ ვიყოთ ავტორიტეტულები, ლიდერები და, ამავდროულად, პატივისცემა დავიმსახუროთ გუნდის წევრებისგან.
გაგიზიარებთ რამდენიმე რჩევას თქვენი გუნდის ეფექტური მენეჯმენტისთვის:
დაამყარე და შეინარჩუნე კარგი კომუნიკაცია
აუცილებელია თანამშრომელი იყოს ინფორმირებული თითოეული მიმდინარე პროექტისა და მიზნების შესახებ – ეს შენი კომუნიკაციის საშუალებით უნდა მოხდეს. შენი მხრიდან ე.წ „feedback“-ების წახალისება განსაკუთრებით ხელს შეუწყობს თანამშრომლებსა და შენს შორის უშუალო დამოკიდებულებას – იყო „ხელმისაწვდომი“ მათთვის, რაც გულისხმობს კითხვების თავისუფლად დასმასა და პასუხების მიღებას.
შექმენი პოზიტიური სამუშაო გარემო
ძალიან მნიშვნელოვანია გუნდის წევრებს იცნობდე ინდივიდუალურად, არამარტო პროფესიონალური კუთხით, პირადადაც კი. როდესაც იცი, ვინ რითია დაინტერესებული ან გატაცებული და ამას ითვალისწინებ, სამუშაო გარემო მეტად ჰარმონიული ხდება.
დააფასე შრომა
ნუ იქნები იმ უფროსების რიცხვში, ვინც მხოლოდ მაშინ აფასებს საქმეს, როდესაც კრიტიკის საბაბი აქვს. თანამშრომლებს პოზიტიური გამოხმაურებით დაეხმარები შენდამი ნდობის განმტკიცებაში და ხელს შეუწყობ მომავალში უფრო მეტ ჩართულობას. ამიტომ აუცილებელია აღიარო მათი მიღწევები, ძალისხმევა და წაახალისო ისინი, რადგან ეს ყველაზე კარგად შენ შეგიძლია.
იყავი ნამდვილი
კარგად გაითავისე, რომ შენი გუნდისთვის „ზეადამიანი“ არ ხარ; როცა თავს ცუდად იგრძნობ და დახმარება დაგჭირდება, უბრალოდ აღიარე და ემოციები გამოხატე. თუ შეცდომას დაუშვებ, თქვი – აჩვენე შენი გუნდის წევრებს შენი სახე და ისინი მეტად კომფორტულად იგრძნობენ თავს შენთან მუშაობის პროცესში.
ნუ უფრთხი გადაწყვეტილების მიღებას
კარგი ლიდერი მნიშვნელოვან გადაწყვეტილებებს უშიშრად იღებს. განსაკუთრებულად საჭიროა, გადადგა სწორი და მტკიცე ნაბიჯი, რომელიც შენს საქმეს გამოადგება.
სწორად გაუნაწილე საქმეები თანამშრომლებს
კარგი ურთიერთობებისა და ინდივიდუალური გაცნობის მიზანი, საბოლოოდ, არის, გაიგო გუნდის წევრების ძიერი მხარეები. ადამიანები ყველაზე შრომისუნარიანები და ეფექტურები არიან იქ, სადაც საკუთარი თავის რეალიზაცია ყველაზე კარგად გამოსდით. ასე რომ, ფუნქციების სწორად გადანაწილებას, თანამშრომლების მეტი პროდუქტიულობა მოაქვს.
კონფლიქტების მოგვარება
ნებისმიერი სახის კონფლიქტის იგნორირების შემთვევაში, გარემო აუცლიებლად ნეგატიური იქნება. ეს კი, რა თქმა უნდა, გუნდის პროდუქტიულობასა და კომუნიკაციაზე იმოქმედებს. სანამ პრობლემა გართულდება, საჭიროა მისი თავიდანვე აღმოფხვრა.
მიეცი კარგი მაგალითი
გუნდის შთაგონებისა და მაგალითის წყარო აუცილებლად შენ უნდა იყო, რისთვისაც უფრო მეტ პატივისცემასა და კარგ მოპყრობას დაიმსახურებ. იმას, რასაც მათ მოსთხოვ – შრომასა და თავდადებას, პირველ რიგში, შენ უნდა აკეთებდე. დარწმუნდი, რომ აკეთებ შენს საქმეს, ავითარებ კარიერას და შენი გუნდიც ფეხდაფეხ გამოგყვება.
მოამზადა მარიამ ტაბაღუამ
შეავსე #ქვიზი და გაიგე: როგორი მენეჯერი ხარ?
Loading…