ადამიანი, რომელმაც რამდენიმე წლის წინ რადიკალურად შეცვალა პროფესიული ცხოვრება, წამოვიდა ერთ–ერთი რუტინული და ყოველდღიური საქმიანობიდან, აიღო აპარატი და დაიწყო იმის კეთება, რაც ანიჭებდა სიამოვნებას – ასე ახასიათებს 36 წლის თვითნასწავლი ფოტოგრაფი – ბილი (დავით) ბილიხოძე საკუთარ თავს.
სოციალურ ქსელებში მისი ფოტოები განსაკუთრებული მოწონებით სარგებლობს – საკუთარი სტილის, გამორჩეული თემატიკის, ფერებისა და ხედვის დამსახურებით.
გთავაზობთ „ვენიუს“ ინტერვიუს ბილი ბილიხოძესთან.
– ფოტოგრაფიით როდის დაინტერესდი და, ამ ეტაპზე, რა ადგილი უკავია შენს ცხოვრებაში?
– ფოტოგრაფიით, დაახლოებით, ხუთი წლის წინ დავინტერესდი. თავიდან ტელეფონით დავიწყე გადაღება, მალევე მეგობარმა მაჩუქა „Canon-ის“ ფოტოაპარატი, რომელიც ჩემი პირველი ციფრული ფოტოაპარატი იყო.
უკვე ხუთი წელია ეს არის ჩემი პროფესიაც, საყვარელი საქმიანობაც, ჰობიც და ყოველდღიურობა. ამიტომ, საკმაოდ დიდი ადგილი უჭირავს ჩემს ცხოვრებაში.
– რამდენად პერსპექტიულია საქართველოში ფოტოგრაფობა / ფოტოგრაფია?
– სამწუხაროდ, ჯერჯერობით, არ არის ისეთი პერსპექტიული, როგორსაც ვისურვებდი, რომ ყოფილიყო.
– მიღწევები, რომლითაც ამაყობ.
– ჩემი ფოტოები დაიბეჭდა ჟურნალ „National geographic-ის“ რამდენიმე ნომერში. იყო კიდევ პატარ-პატარა საამაყო მიღწევებიც, მაგრამ ყველაზე მნიშვნელოვნად ამას გამოვყოფდი.
– სჭირდება თუ არა ფოტოგრაფიას განწყობა და როგორ არჩევ გადასაღებ თემატიკას?
– ჩემი აზრით, როცა საყვარელ საქმეს აკეთებ, განწყობის არქონა ძალიან იშვიათია. თემატიკას რაც შეეხება, წინასწარ არასოდეს ვიცი, რას მიმზადებს სამყარო და ამიტომაც არის ჩემთვის ასე საინტერესო.
– განსაკუთრებით რისი გადაღება გიტაცებს?
– მწერებისა და მცენარეების მაკროფოტოების.
– ფოტო, რომელიც გამორჩეულად გიყვარს.
– ფოტოგრაფიის მიმართულებით რა სამომავლო გეგმები გაქვს?
– კონკრეტული გეგმები არ მაქვს. ამჟამად ვმუშაობ ინტერიერ-ექსტერიერისა და არქიტექტურის მიმართულებით.
გეგმას წარმოადგენს მუშაობა საკუთარ თავზე, ახალი გამოწვევების მიღება და ახალი მიმართულებების აღმოჩენა.
Loading…